ඊශ්‍රායල් ගුවන් ප්‍රහාරයකින් අල් ජසීරා ඇතුළු මාධ්‍ය කාර්යාල තිබූ ගොඩනැඟිල්ලත් විනාශයි
පලස්තීනුවන්ලේ සහායට දහස් ගණනක් ජනයා පා ගමනේ
මියගිය අය අතර දුසිම් ගණනක් සටන්කාමියෝ
ගාසා තීරයේ ඊශ්‍රායලය සහ පලස්තීන සටන්කාමීන් අතර පවතින සටන් මධ්‍යයේ පලස්තීනුවන්ට සහාය දැක්වීමට දහස් ගණනක් ජනයා මධ්‍යම ලන්ඩනය හරහා පා ගමනක් පවත්වා තිබේ. විරෝධතාවේ සංවිධායකයන් එක්සත් රාජධානියේ රජයෙන් ඉල්ලා සිටියේ “පලස්තීන ජනතාවට එරෙහි ඊශ්‍රායලයේ කුරිරු ප්‍රචණ්ඩත්වය සහ හිංසනයට” ඉඩ නොදෙන ලෙසයි. “නිදහස් පලස්තීනය” යනුවෙන් හඬ නැඟූ උද්ඝෝෂකයෝ ඊශ්‍රායල තානාපති කාර්යාලය ඉදිරිපිටට ගියහ. එය පැමිණෙන්නේ 2014 සිට ගාසා තීරයේ සහ ඊශ්‍රායලයේ ඇති වූ දරුණුතම ප්‍රචණ්ඩත්වයෙන් පසුවය. සඳුදා සටන ආරම්භ වූ දා සිට ගාසා තීරයේ අවම වශයෙන් පුද්ගලයන් 139ක් සහ ඊශ්‍රායලයේ නව දෙනෙකු මිය ගොස් තිබේ.
ගාසා තීරයේ මියගිය අය අතර දුසිම් ගණනක් සටන්කාමීන් සිටින බව ඊශ්‍රායලය පවසන අතර පලස්තීන සෞඛ්‍ය නිලධාරීන් පවසන්නේ එයින් අඩකට ආසන්න ප්‍රමාණයක් කාන්තාවන් සහ ළමයින් බවයි. නැඟෙනහිර ජෙරුසලමේ සති ගණනාවක් තිස්සේ ඊශ්‍රායල-පලස්තීන ආතතිය උත්සන්න වීමෙන් පසුව එය සිදු විය. ගාසා තීරය පාලනය කරන සටන්කාමී ඉස්ලාමීය කණ්ඩායම වන හමාස් සංවිධානය ඊශ්‍රායලයට එම ස්ථානයෙන් ඉවත් වන ලෙස අනතුරු ඇඟවීමෙන් පසු රොකට් ප්‍රහාර එල්ල කිරීමට පටන් ගත්තේය. සෙනසුරාදා ගාසා තීරයේ සරණාගත කඳවුරකට එල්ල වූ ඊශ්‍රායල ගුවන් ප්‍රහාරයකින් පුද්ගලයන් 10 දෙනෙකු මිය ගිය අතර පලස්තීන රොකට්ටුවකින් ඊශ්‍රායලයේ පුද්ගලයෙක් මිය ගියේය. ඊශ්‍රායල් ගුවන් ප්‍රහාරයකින් උස් ගොඩනැඟිල්ලක කාර්යාල පවත්වාගෙන ගිය ඇසෝසියේටඩ් ප්‍රෙස් සහ අල් ජසීරා ඇතුළු මාධ්‍ය සංවිධානවල කාර්යාල සහිත මහල් නිවාස ගණනාවක් විනාශ විය. ඊශ්‍රායල හමුදාව පැවසුවේ මේ ගොඩනැඟිල්ලේ හමාස් සංවිධානයට අයත් මිලිටරි වත්කම් ඇති බවයි.
